O noso barrio volveu facelo. A terceira edición do SOLIFEST non só foi un éxito desbordante de público, senón que acaba de confirmarse como un fito histórico de solidariedade para a nosa comunidade.
Nun acto celebrado no Centro Princesa Letizia de Vilagarcía de Arousa, a organización fixo entrega dun cheque por valor de 11.438,15 euros destinados ás persoas usuarias de Amencer-ASPACE. Para que vos fagades unha idea do incrible que é isto: pasamos de recadar 2.275 euros na primeira edición a case 8.000 na segunda, e este ano incrementamos a cifra nun 43,3%!
CARA ONDE VAI O NOSO ESFORZO?
Cada euro que doastes consumindo e participando ten un obxectivo vital. Este ano, os fondos investiranse integramente en programas especializados que melloran o día a día das persoas con parálise cerebral tales como terapia asistida con cans, sesións de piscina adaptada e sesións de hipoterapia.
A maiores, unha parte importante da recadación irá destinada a un fondo común para a financiación de sesións de rehabilitación dirixidas a aquelas persoas usuarias que contan con menos recursos económicos.
Durante a entrega, David Carrera, director do centro, deixounos unhas palabras que resumen por que facemos isto: “Grazas a esta edición do SOLIFEST axúdadosnos a facer posible un millón de sorrisos e a seguir cumprindo metas e soños”. E o máis importante de todo: conseguimos unha integración real, facendo que os usuarios se sintan cidadáns e cidadás máis da nosa sociedade.
UN ÉXITO DE TODA A TRIBO
Esta cifra récord certifica o éxito absoluto da convocatoria, pero nada disto sería posible sen o apoio incondicional de moita xente. Queremos agradecer de corazón a todos os artistas e negocios locais que colaboraron de xeito altruísta.
Tamén agradecemos o respaldo imprescindible do Concello de Vilagarcía de Arousa, da Deputación de Pontevedra, e de todas as organizacións políticas locais (PSdeG-PSOE, PP, BNG e Esquerda Unida) que demostraron que o traballo conxunto entre institucións e movemento veciñal funciona.
NON HAI TRES SEN CATRO: PREPARADOS PARA O 2027!
A maquinaria non para, e como as boas novas veñen de tres en tres, xa temos os ollos postos no futuro. Apuntade a data: a cuarta edición celebrarase o domingo 18 de abril de 2027 no que con orgullo chamamos “o mellor barrio do mundo”, O Piñeiriño.
E para que a espera non sexa tan longa, xa temos as primeiras confirmacións : a agrupación Froallo e os DJs Carlos Crespo e Kris K Dj. Eles levan connosco dende o principio, poñendo banda sonora ao barrio cando só eramos unha pequena tarima cunha sombrilla.
Agora somos un dos mellores festivais de Galicia, que seremos o ano que vén?. Vémonos no 2027!
